மனம் விரும்பா ஒப்பனைகள்...

அடுத்த நாடக ஒத்திகைக்கு
என்னை ஒப்பனை செய்து கொள்கிறேன்
கூடத்தில் தெரிந்தோ தெரியாமலோ
ஒருவர் அமர்ந்திருக்கலாம்
அவருக்காக புன்னகையைக்
கொஞ்சம் செதுக்கிக் கொள்ள
வேண்டும் ...
கைப்பேசியின் பக்கங்களில்
அவர் எண்ணுக்காக
ஓர் இடம் ஒதுக்க வேண்டும்...
உதடு விரியும் மட்டும்
கொஞ்சம் பேசிப் பார்க்க வேண்டும்
கையில் திருமண அழைப்பிதழ்கூட
இருக்கலாம்..
மனம் மறைந்த முகத்தை
தோண்டியெடுக்கும் முயற்சிகளில்
இருவருமே போராடிக்கொண்டிருக்கலாம்..
..... இடங்கள்
..... காலங்கள்
..... தொழில்கள்
..... விளையாட்டுகள்
..... பால்யங்கள்
ஒவ்வொன்றாய் வழுக்கி வழுக்கி
விளையாடும் வேளைகளில்
ஒரு புன்னகையோடு
விடை பெற்றுப் போன பின்பும்
மனம் மட்டும்
தேடல் ஆராய்ச்சியில்
தொடர்ந்து கொண்டே ...

#முனியாண்டி_ராஜ்.*