இறக்கை முளைக்கும் கணங்கள்

இறக்கை முளைக்கும் கணங்கள்

===•••===•••===•••===•••==
பரந்த ஒரு விண்வெளியில்
எனக்கும்தான் இறக்கையின்றி விரிந்திருந்தது
ஓர் உலகம் 
இறக்கைகைள் முளைத்து ஒவ்வொருவரும்
பறந்து களிக்கும் நேரங்களில்
மேகங்களுக்கு உள்ளே ஓடியோடி
எதையோ தேடிக் கொண்டிருந்தது அது
மேகங்களுக்கு மேலேயும் கீழேயும்
பறந்து கொண்டிருந்தவர்களால்
அதைப் பார்த்திருக்க முடியாதுதான்
மேகங்கள் சிதறியடிக்கும் சில துளிகளில்
குடைகளுக்கு ஒளியும் மனம் அவர்களது
மழையின் மூலத்தை தேடியறிய
இறக்கைகள் தேவையில்லை எனக்கு

எனது அது
மேகங்களை உடைத்து உள்நுழையும்
முயற்சிகள் ஒவ்வொன்றிலும்
ஏதாவது ஒரு துளியைத்
திருடிக் கொண்டு வருவது உண்டு
தனியனாக இறக்கையின்றி திரிவதில்
அப்படி ஒரு சுகம் அதில்..
இறக்கைகள் முறிந்து விழுவோரும்
ரணங்கள் அணிந்து குதிப்போரும்
இறக்கைகளைப் பிய்த்தெறித்து போவோரும்
மரணங்களை நெருங்க நெருங்க
பறக்கும் ஆசை வெறுத்துப் போனது எனக்கு

திடீரென ஒரு விழி விபத்தில்
எனக்கும் இறக்கைகள் முளைக்கும்வரை!

#முனியாண்டி_ராஜ்.