சிலரது அகராதிகளில் ....

சிலரது அகராதிகளில் ....
===•••===•••===•••===
இவர்களை நீங்கள் 
சோம்பேறிகள் வரிசையில் சேர்த்துக்கொள்ளத்தான் வேண்டும்
அதிகாலை எழுந்து
அவசரங்களில் அத்தனை கடன்களும் முடித்து
மிதிவண்டியிலோ இன்னுந்திலோ
சாலைகளின் புகைகள் கடந்து
அலுவலகங்களின் கோப்புகளில் புதைந்து
உணவு வேளைகளில் செரிப்புக்காக
எதையோ தின்று
மாலைகளின் முள்நகர்த்தலில்
முகம் வியர்த்து
மீண்டும் சாலைகளின் அல்லல் கடந்து
இல்லம் நுழைந்து
தினசரிச் செலவில் மிச்சம் பார்த்து
நாளைய பொழுதுக்கான திட்டமிட்டு
மீந்துகிடக்கும் அலுவலக வேலைகளில்
மடிக்கணினி நுழைந்து
நிறமற்ற தொலைக்காட்சிகளில் பார்வைகளை
அவ்வப்போது மேயவிட்டு
நள்ளிரவு நட்சத்திரங்களை எண்ணியவாறே
கனவுகள் மறந்த ஓர் உறக்கத்தில்
விழும்போது...
நீங்களே நிர்ணயம் செய்து கொள்ளுங்கள்

#முனியாண்டி_ராஜ்.