இழந்து போனவை இறந்து போனவை
===•••===•••===•••===•••==
இன்னும் எனக்கு வியப்புதான்
இறக்கையின்றி
அவை எப்படிப் பறந்திருக்க முடியும்
கால்களின்றி
அவை எப்படி நடந்திருக்க முடியும்
இரவலென்று வாங்கிச் சென்றவர்கள்
எப்படி அதைப் பெயரிட்டிருப்பார்கள்
பெயர் எங்கே எழுதியிருப்பார்கள்
என் பெயர் அழித்தா..
என் பெயர் வெட்டியா..
தாள் கிழித்து வேறொரு தாளிலா
சிந்தையில் சிக்கிக் கொண்டு
சின்னாபின்னமாகிக் கொண்டிருக்கிறேன்
இதயம் கழட்டி
எப்படி வாசித்திருக்க முடியும்
அறிவுத்திருட்டு என்றோ
அறிவுத் திரட்டென்றோ
ஒதுங்க மறுக்கும் கோபங்களை
எப்படிக் கட்டி வைப்பேன்
அடுக்குகளில் டக்கென்று உருவப்பட்டு
பட்டென்று களவுபோன நண்பர்களுக்காக
எவ்வாறு ஆறுதல் சொல்வேன்
வியப்பு வியப்பாகவே இருக்கிறது
வெற்றிடங்கள் வெற்றாகவே இருக்கட்டுமென
வேண்டுமென்றே வைத்திருக்கிறேன்
இன்னொரு புத்தகம்
இரவலில் இறந்து போகாமல் இருக்க!
#முனியாண்டி_ராஜ்.
No comments:
Post a Comment