உடையும்_நிஜங்கள்

#உடையும்_நிஜங்கள்

===•••===•••===••
யார் யாரோ கைகுலுக்கிக் செல்வதுபோல்
இருக்கிறது
ஓர் இளைத்த பார்வையில்
தோளில் தட்டியும் செல்கின்றனர் பலர்
இதயம் தொடா முறுவல்களில்
முகம் காட்டி மறைகின்றனர்
இடைவெளியற்ற தூரம் நின்று
துக்கங்களைக் காற்றில் அனுப்புகிறார்கள்
கட்டியணைத்து ஆறுதல் வீசிவிட்டு
கூட்டங்களில் கலந்து
கதைகளில் கரைந்து போகும் நபர்களில்
எதையோ தேடி ஓடுகிறது நிஜம்

ஒரு மரணத்தின் விசாரணையில்
மனிதர்கள் பல வேறான கூண்டுகளில்
தங்கள் உணர்ச்சிகளில்
நின்றுகொண்டே மௌனியாகிறார்கள்
காற்றில் கலக்கா உயிரொன்று
இன்னும் ஒவ்வோர் இடைவெளிக்குள்ளும்
நுழைந்து
மனிதர்களை எடை போட்டுக் கொண்டே
நகர்ந்து செல்கிறது
கடைசித்துளி ... கண்ணீரோடு!

#முனியாண்டி_ராஜ்.